以前地產商發大財嘅年代，廣告公司接一個地產公司嘅合約，可能已足夠養起一team全年。不過相對地產客嘅要求亦都好高，一本樓書設計要精美不在講，相片要指定名模由某某名攝影師操刀，就連印刷嘅用料都極之講究。Art team 做好mockup去見客，第二日打電話嚟要求「試試有無其他options」，當時公司剛剛換咗部多功能 打印機，好快就變成地產team嘅私家機！無時無刻接收最高像素嘅TIFF檔，而且要去唔同嘅美紙品鋪，只要部機承受得起，就咩紙都放入去試印：牛皮紙、畫咭甚至藤席都試過！幾乎將部多功能打印機嘅全部功能都用盡晒為止。
亦因為咁樣長期消耗，jam紙閒過食飯，有時個超巨型print file卡死咗個queue兼jam機，剷唔走又郁唔到真係欲哭無淚！當年唔似今日有專門IT 外判服務咁方便，維修熱線最多都係叫你熄機然後開機，唔似今日嘅IT外判服務可以remote diagnosis 或者雲端recovery救急扶危。跟住就會見到art director 哥哥四處向鄰team雪地跪求借printer應付三小時後嘅presentation。今日科技進步，做mockup已經無以前咁痛苦，但係同樣已經無咁多需要太複雜手工嘅印刷job，一擲千金嘅大豪客，更加已變成傳說…
